Tēvita O. Ka'ili | Tala Koula Interview 10 March 2020

Ko e hoko atu ai pe ‘o e veitatala pea mo Palofesa Tēvita O. Ka'ili fekau’aki mo e Tala ‘o Tonga. ‘I he uike ni ‘oku fai ai e talatalanoa fekau’aki pea mo e ngaahi ‘ilo faka-Saienisi mo faka-’Asitalonoma ne mataotao ai ‘a e Ha’a Maui (Maui ‘Atalanga, Maui Kisikisi/Fusifonua, pea pehe foki kia Hina). ‘Oku kau ai foki heni ‘a ‘enau ‘ilo ki he Ngaahi Pupunga fetu’u pe ‘Otu Kaveinga ‘oku ui ko e Mata’u ‘a Maui, pe ‘oku ‘iloa ko e Scorpion ‘I he Saienisi ‘a e Uesite. Pea pehee ki he 'Otu Kaveinga ko ia ko e Ha'amonga 'a Maui Motu'a, pe 'oku 'iloa 'i he Uesite ko e Orion. Na’e faka’aonga’i foki ‘eni ‘e Maui 'Atalanga mo Maui Fusifonua ki he’ena kumi fonua fo’ou. ‘Oku toe fai foki mo e lave ki he Ha’amonga, pea mo hono mahu’inga ko ia ki hono tala ‘o e Taimi, mo e ngaahi faha’ita’u ki he ngoue pea mo e folau tahi. Kae pehee foki kia Hina mo 'ene mataotao 'i he tekinolosia fo'ou ko ia 'o e lalanga. Ko e ni’ihi si’i pe ‘ena ‘o e ngaahi kaveinga ‘oku fai ki ai e veitatala ka ke toki me’a hake pe ki ai ‘i he Tohi 'Ata 'i ha’o faingamalie. Fakamalo ai pe kia Palofesa Ka’ili ‘i he fie fakamoleki hono taimi ke vahevahe mai ‘a e ngaahi ‘ilo ko ‘eni ma’a hotau kainga Tonga. Fakamanatu atu ai pe ko e uike 2 ‘o e mahina kotoa ‘e hokohoko atu ai ‘etau veitatala ki he Tala ‘o Tonga pea mo Palofesa Ka’ili.

Category